KIMI ensemble samanstendur af Jónasi Ásgeiri Ásgeirssyni harmóníkuleikara, Katerinu Anagnostidou slagverksleikara og Þórgunni Önnu Örnólfsdóttur söngkonu. Tríóið einbeitir sér einkum að flutningi nýrra verka sem samin eru fyrir sérstæða hljóðfærasamsetningu hópsins, í bland við eigin útsetningar á þjóðlagatónlist frá heimalöndum sínum - Íslandi og Grikklandi. KIMI hefur komið víða fram bæði hérlendis og erlendis, og má þar nefna hátíðir og tónleikaraðir svo sem Feneyjartvíæringinn, Sumartónleika í Skálholti, Seiglu og NJORD Biennale. Hópurinn hefur tvívegis hlotið tilnefningu til Íslensku tónlistarverðlaunanna í flokknum sígild og samtímatónlist, fyrst fyrir tónleika ársins 2021 og síðar sem flytjandi ársins 2026. Þá var KIMI nýverið tilnefndur til ECHO Rising Stars framtaksins af hálfu tónlistarhússins Hörpu, sem er samstarfsverkefni helstu tónlistarhúsa Evrópu.

Fyrsta smáskífa hópsins kom út árið 2022 á vegum Dacapo Records - hljóðritun á verkinu Bittersweet eftir Nick Martin. Sama ár tók KIMI þátt í leikverkinu Livia’s Room eftir Lene Therese Teigen í Björgvin, þar sem þau fluttu tónlist eftir Þuríði Jónsdóttur. Verkið var nýverið flutt í Circolo Scandinavo í Róm og mun hljóðritun á tónlistinni koma út síðar á þessu ári. Meðal annarra þverfaglegra verkefna má nefna „gesamtkunstwerk“sænsku listakonunnar Lap-See Lam í Norræna skálanum á Feneyjartvíæringnum árið 2024, þar sem hópurinn flutti tónlist norska tónskáldsins Tze Yeung Ho. KIMI hefur unnið með fjölda íslenskra og erlendra tónskálda; meðal nýlegra verkefna má nefna samstarf við tónskáldin Maríu Huld Markan Sigfúsdóttur, Hauk Tómasson, Kolbein Bjarnason og Udi Perlman, og undirbýr tríóið um þessar mundir ný verk eftir Guðmund Stein Gunnarsson og japanska tónskáldið Aya Yoshida.